Biodonostia OIIko Esklerosi Anizkoitzaren ikerketa taldeko kideak
Maiatzaren 30ean Esklerosi Anizkoitzaren Munduko Eguna ospatzen da. Ezgaitasuna eragin dezakeen garuneko eta bizkarrezur-muineko (nerbio-sistema zentrala) gaixotasuna da Esklerosi Anizkoitza. Gaixotasunak ez du sendabiderik. Hala ere, tratamendu batzuk lagungarriak dira agerraldiak bizkortzeko, gaixotasunaren bilakaera aldatzeko eta sintomak kontrolatzeko.
Biodonostia OIIak eta Donostialdea ESIk hogei urte baino gehiago daramatzagu gaixotasun hau ikertzen Esklerosi Anizkoitzaren taldean, Estatuko eta Euskadiko elkarteekin eta gure Gipuzkoako ADEMGI elkartearekin lankidetza estuan.
Beste urte batez, gaixotasunaren munduko egun hau ospatzen dugu, gaixotasunari ikusgarritasuna ematen laguntzeko, pazienteei babesa emateko eta Esklerosi Anizkoitza ikertzen laguntzeko, gure ezagutza eta ahalegina eskainiz.
Urte hauetan zehar, askotariko gaiak ikertu ditugu gaixotasuna eta pazienteak ulertzeko, eta patologia horren erabilera klinikoa hobetzeko asmoz. Gure egungo ikerketa-ildoek immunitate-sistemaren gene-mailako erregulazioa aztertzea eta immunitate-sistema horren zahartzea dute ardatz. Gure gorputzak berak gaixotasunak eragindako lesioak konpontzeko prozesua ere aztertzen dugu (birmielinizazioa), bai eta kanpoko edo ingurumeneko beste faktore batzuen eragina ere, hala nola kolesterola, D bitamina eta, jakina, mikrobiotak gaixotasunean duen eragina. Azken alderdi hori da pazienteei gehien interesatzen zaien gaietako bat. Gaur egun, nazioarteko partzuergo bateko kide gara, gure hesteetako mikroorganismoek gaixotasunean duten eragina aztertzeko. Halaber, biomarkatzaileak, tratamenduen albo-ondorioak eta terapien saiakuntza klinikoak ikertzeko ildo irekiak ditugu, horiek guztiak garrantzitsuak izanik gaixotasunaren erabilera klinikorako.
Aurrera jarraituko dugu!
Eutsi goiari!
Entzun “Esklerosi anizkoitza duen kaltetu batek bere gaixotasunaren ikertzaileari egindako elkarrizketa”, SER Euskadin, Esklerosi Anizkoitzaren Munduko Eguna dela eta. Olaya Fernandez David Otaegui zientzialariarekin aurrez aurre eseri da eta bere zalantzak eta itxaropenak azaldu dizkio. (Gazteleraz)
