IIS Biodonostiaren ordezkaritza bat Translaziozko Medikuntzarako Europako Plataformaren (EATRIS) Annual Meeting-en parte hartu du duela gutxi. EATRIS-Portugal Nodo Nazionalak antolatu du, eta INFARMEDek Lisboan duen egoitzan izan da.
EATRISek urteroko topaketak egiten ditu bere nodoetan, eta gai zehatzak lantzen ditu, betiere translazio-medikuntzari begira. Oraingo honetan, medikuntza pertsonalizatua izan da bileraren gai nagusia.
Topaketan, EATRISek etorkizuneko ekintzetan medikuntza pertsonalizatuaren garapenean izango duen zeregina zehaztu zen, gai honen inguruan gaur egun dauden erronka eta aukerak kontuan hartuta. Halaber, eztabaidatu zen nola ustiatu Plataformak pazienteen komunitatearen beharrak asetzeko dituen gaitasunak, eta nola garatu komunitate horri zuzendutako ekintzak ezartzen lagunduko duten teknologiak. 
Gainera, egiaztatutako Osasun Ikerketako Institutu (ISI) asko bertan zeudenez, Carlos III.a Osasun Institutuak (ISCIII) antolatutako berariazko bilera bat egin zen, eta bertan EATRISen National Contact Point (NCP) berria aurkeztu zen, ISCIIIn bertan kokatua, Plataformaren eta Institutuen arteko solaskide gisa arituko dena, harreman arinagoa eta zuzenagoa izateko.
Zalantzarik gabe, topaketa emankorra izan da, eta hainbat aukera sortzea espero da.
